मनकामनापोष्ट

Written by 11:08 am ताजा अपडेट, मधेस प्रदेश, राष्ट्रिय

राजविराज कारागारका केदिबन्दिहरु द्वारा प्रदर्शन



शुभ नारायण यादव

सप्तरी । सप्तरीको राजविराजस्थित कारागारका कैदीबन्दीहरुले जेलर, चौकिदार र मुल नाइकेहरुविरुद्ध नाराबाजी र प्रदर्शन गरेपछि आज दिनभर तनावग्रस्त बनेको छ ।
कैदीबन्दीहरुले परिवारका सदस्यहरुलाई भेंटघाट गर्न रोकटोक गरेको, औषधउपचारमा वेवास्ता गरेको, जाडोको कपडा, सिरकलगायत राज्यबाट प्राप्त सुविधा नदिएको भन्दै नाराबाजीसहित प्रदर्शन गरेको बताए । कारागार तनावग्रस्त बनेपछि कारागारभित्र इन्स्पेक्टर रामनारायण सिंहसहित सुरक्षाकर्मीको उपस्थिति बढाइएको छ ।
इन्सेक सप्तरी प्रतिनिधि मनोहर पोखरेल नेतृत्वको इन्सेकको टोली समेत कारागार पुगेर जेलर सुमन कोइराला र चौकिदार श्याम यादवसँग भेंटघाट गरी वस्तुस्थितीका बारेमा जानकारी लिनुभएको छ । इन्सेक सहजकर्ता दिपक यादव र इन्सेकद्वारा गठित नगरस्तरिय मानव अधिकार निगरानी समूहका अध्यक्ष रघुबर साह सहित पुग्नु भएका पोखरेलले कैदीबन्दीहरुसँग मानवोचित व्यवहार गर्न र समस्या सम्बोधन गर्न माग गर्नुभएको छ । यसैगरी संवेदनशीलतालाई मध्यनजर गर्दै कारागारमा आवश्यक सुधारका लागि कैदीबन्दी र कारागार प्रशासनबीच पुलको काम गर्न चौकीदार यादवसँग टोलीले आग्रह गरेको छ । कारागार तनावग्रस्त भएकाले कैदीबन्दीहरुसँग भेंटन भने कारागार प्रशासनले नदिएको पोखरेलले बताउनु भयो ।
कारागार तनावग्रस्त भएपछि मुल नाइके र नाइकेहरु परिवर्तन गरी बी ब्लकमा सारिएको छ भने शुक्रबार राति २ सय २५ ओटा सिरकहरु ल्याइएको छ ।
राज्यले दिने सबै सुविधा समयमै उपलब्ध गराइएको, विरामीलाई औषधउपचारका लागि अस्पताल पठाउने गरिएको र कैदीबन्दीहरुको परिवारलाई विहान ११ देखि दिउँसो २ बजेसम्म भेंटघाट गर्न दिइएको जेलर सुमन कोइरालाले बताउनु भयो ।
यता सो कारागारमा हाल एक आश्रित बालकसहित १२ जना महिला र ३ सय ५० पुरुष गरी ३ सय ६३ जना कैदीबन्दी छन् ।

(Visited 1 times, 1 visits today)

HTML tutorial